Isa 13 | NdeIBE | STEP | Leli yilizwi elimayelana leBhabhiloni elaboniswa u-Isaya indodana ka-Amozi:

Isaiah 13

Isiphrofetho ngeBhabhiloni

1 Leli yilizwi elimayelana leBhabhiloni elaboniswa u-Isaya indodana ka-Amozi:

2 Phakamisa uphawu phezu koqaqa oluligceke, umemezele kubo, ubaqhwebe ngesandla ukuba bangene emasangweni asesikhosini.

3 Sengibalayile abangcwele bami, sengiwalayile amaqhawe ami ukuba afeze ulaka lwami – lawo athokozela ukunqoba kwami.

4 Lalelani, umsindo phezu kwezintaba onjengowexuku elikhulu. Lalelani, ukuxokozela phakathi kwemibuso njengezizwe zibuthana ndawonye! UJehova uSomandla ubutha ibutho elibuthela impi.

5 Bavela emazweni akude, emikhawulweni yamazulu – uJehova lezikhali zolaka lwakhe – ukuba kuchithwe ilizwe lonke.

6 Lilani ngoba usuku lwenkosi seluseduze. Luzafika njengokuchithakala okuvela kuSomandla.

7 Ngenxa yalokhu izandla zonke zizakuba buthakathaka, izinhliziyo zabantu bonke zizaphela amandla.

8 Bazakuba lokwesaba okukhulu, baphathwe yibuhlungu losizi; bazabhinqika njengowesifazana ehelelwa. Bazakhangelana bemangele, ubuso babo bungamalangabi.

9 Khangelani usuku lukaJehova luyeza – usuku lwesihluku, ulaka lokuthukuthela okukhulu – ukwenza ilizwe lichitheke, kubhujiswe izoni eziphakathi kwalo.

10 Izinkanyezi zezulu lemithala yazo akuyikukhanyisa. Ilanga eliphumayo lizafiphazwa lenyanga ayiyikukhanyisa.

11 Umhlaba ngizawujezisa ngenxa yobubi bawo, lababi ngenxa yezono zabo. Ngizaqeda ukukloloda kwabazikhukhumezayo ngehlise ukuzigqaja kwabalesihluku.

12 Ngizakwenza abantu basweleke okudlula igolide elicengekileyo, basweleke okudlula igolide lase-Ofiri.

13 Ngakho-ke ngizakwenza amazulu anyikinyeke lomhlaba uzamazame endaweni yawo ngokuthukuthela kukaJehova uSomandla, ngosuku lolaka lwakhe oluvuthayo.

14 Njengempala ezingelwayo, lanjengezimvu ezingelamalusi, omunye lomunye uzabuyela ebantwini bakibo, omunye lomunye uzabalekela elizweni lakibo.

15 Lowo ozathunjwa uzagwazwa; bonke abazabanjwa bazabulawa ngenkemba.

16 Izingane zabo zizamahlazelwa phambi kwamehlo abo; izindlu zabo zizakhuthuzwa, omkabo babanjwe ngodlakela.

17 Khangelani, ngizabavusela amaMede angelandaba lesiliva, njalo engalijabuleli legolide.

18 Imitshoko yawo izabulala izinsizwa; kawayikuba lozwelo ezinganeni loba abe lesihawu ebantwaneni.

19 IBhabhiloni, igugu lemibuso, ubukhazikhazi bokuziqhenya kwamaKhaledi, lizachithwa nguNkulunkulu njengeSodoma leGomora.

20 Akuyikuhlalwa kulo futhi loba kwakhiwe kulo kuzo zonke izizukulwane; akulam-Arabhi ozamisa ithente lakhe khona loba umalusi ozaphumuza imihlambi yakhe khona.

21 Kodwa izinyamazana zasenkangala zizahlala khona, amakhanka azahlala ezindlini zakhona lezikhova zizahlala khona, lamagogo aqolotshe khona.

22 Izimpisi zizakhala ezinqabeni zakhona, amakhanka ezindlini ezinhle zobukhosi. Isikhathi salo sesizafika njalo izinsuku zalo kaziyikwandiswa.